Në prag të tërheqjes së shortit për Euro 2020, kryetari i Federatës së Futbollit të Kosovës (FFK), Agim Ademi ka zhvilluar një takim me presidentin e Federatës së Futbollit të Rumanisë, Razvan Burleanu.

Gjatë këtij takimi u diskutua mundësia e organizimit të kampit të Përfaqësueses së Kosovës gjatë Evropianit 2020, në qoftë se Dardanët arrijnë të kalojnë me sukses sfidën me Maqedoninë dhe atë finale me Gjeorgjinë ose Bjellorusinë në kuadër të “play-off”-it të Ligës së Kombeve.

Në fakt, nëse Kosova e siguron kualifikimin në Euro 2020, atëherë do të jetë në grup me Holandën, Ukrainën dhe Austrinë dhe ndeshjet e këtij grupi do të luhen në Amsterdam dhe Bukuresht, prandaj presidenti Ademi i sheh tri mundësi për kampin e qëndrimit të Kosovës, gjithmonë nëse arrihet kualifikimi.

Si opsione për kampin e Dardanëve, kryetari Ademi sheh ndonjë qytet në Gjermani afër Holandës, pastaj në Amsterdam dhe si mundësi të tretë edhe kampin në Rumani.

Në tërheqjen e shortit që u mbajt në Bukuresht, krahas Ademit ishin edhe presidenti i FSHF-së, Armand Duka dhe ai i FFMV-së, Muamed Sejdini.